Nuju Lieur

Lieur mikiran hayang usaha jang tambah-tambah panghasilan sapopoe. Oge hayang bisa ngalaksanakeun ibadah haji, nyaeta rukun islam anu ka 5. Nya ari kahayang mah samemeh ieu nyawa ninggalkeun raga dipundut kunu kawasa, mudah-mudahan wae bisa kasorang heula nyumponan kawajiban ibadah haji ka batullah. Amin.

Sanajan ningali kondisi ayeuna mah memang asa jajauheun pisan bisa ngalakukeun eta perkara. Alhamdulillah ari jang sapopoe mah aya, dapur ngebul, sakola barudak lancar, kitu oge susu budak, alhamdulillah. Nya peuting ayeuna teh keur lieur ieu teh, rek usaha naon, dagang naon, anu modalna leutik, babari nyieunna, gancang payuna jeung badag batina :)

Ngan ari anu ngaranna rezeki memang kudu percaya jeung kudu yakin. Moal aya anu bisa ngahalang-halang, eta mah da rahasia Allah. Poe ayeuna urang sangsara, boa isuk atawa pageto mah jol-jol aya menang rezeki anu teu disangka-sangka. Da ari masalah rezeki mah, eta mah masalah ghaib. Kawajiban urang salaku manusa nyaeta kudu ikhtiar sakamampuan urang, oge ulah poho kudu ngadu'a iraha wae, dimana wae.

Lieur mikiran masalah hayang boga usaha mah teu nanaon, teu matak doraka. Artina daek lieur, daek mikir. Da jelema mah kudu mikir da dibere akal, beda jeung sato. Sabab tos tunduh, nya ayeuna mah bade ngagoler heula, gogoleran, da ieu si bungsu wayah kieu jam 1 peuting masih keneh jagjag, hadeuh....cag ah